Nomor 1 putri

Pea Makuttu Kalaccik

KARYA;  FAIQAH TALITA NUR ALAM

Deen pissen wattu deen pea disanga Bacok. Yate Bacok aja kalaccik yanna disua manjama tapa masaki–saki apa yanna kumandemo to tau ia mo malappuk na. Yatonna allo sinian nasuai indona “Bacok meko jolo attanna jo manuk ku nasuanko” nakua indona Bacok apaa nakuara Bacok “aihh kita bangmo kena aja loyona tangkukulle lumingka” mangalasan ori tee Bacok sang cia’i disua. Male mi te indona Bacok natta manuk masussa bangmi ia sang mesa–mesa ri na aja macca lesse te manuk alana atta. Na atta mi jo manuk Indona Bacok male mi nasui jo manuk na atta nena, apa yatonna manasu mo tapa aja lappuk mi tee Bacok na mandadu–dadu tongan te Bacok tonna kumandei.

Masawannami, disua omi Bacok male nalanni Indo na kaju di pake mannasu apa magalli–galli omira te Bacok lako Indona na garra–garra topara “capai gana ta sua-sua bangna bisa unaki ga’na nalla mesai ”yate Indo na mapadik bangmi dikka penawanna sadingi kadanna Bacok “oo Puang mangngapa mora ku’na, nasusi gaja kuna te annakka ku”

Eda na masai wattumi to ba’tang tangbarah, “aja tangbarahna kuna na imbade ora tee indo ku eda topa na mannasu na laba” nakua Bacok tonna nabukka i to passambo na edapa pakandean sadia. ”Mera kapalena jio warung kumande apa eda kana doi ku, bisa kapang ke kalaccik bangmo le?” mampikkiri bangmi Bacok matumbai tetoo na bisa eda na mambajah. Jio omi nte jalan akkalan kalaccikna Bacok “ohh pura–pura bangmo tetoo ka mangkami ku bajah” male mi Bacok lako warung na gasak mi mangngali Bacok na alli nasan mi to apa na kadoangngi.

Barah mi Bacok la pole mira mamma. Tonna lamessun mi Bacok na gorai i jo pambaluk  nakua mo joo pambaluk “woi Bacok bajahhi jolo tu pangngalanmu mu mane pole” tapa nakua mo Bacok “wah macca bangki kitana mangkami kuna ku bajah nena” selang bangmi te Bacok sang kaissenanni ka kalaccikki “iyo raka? mangkami pale mu bajah nena?” pekutananna tee pangbaluk “iye mangkami iya ku bajah nena” “ohh memoko pale tabe ka ku tuduh–tuduh ko nena” labami Bacok lako bolana masannang bangmi sang eda na kaissenan ka kalaccikki.

Pirang allo mangkanna kalaccik te Bacok madong omi kalaccik, na ka’ mi jo kalaccik lako pambaluk lamale omira kalaccikki pea biccuk “wihh anna kaja budaiya doina jo pea” madoangngi borroi i jo pea “weee memboko pea?” nakua mo jo pea “lamalena mangngalli” “doi mu tuu aja buda?” pekutanaanna Bacok lako jo pea “iye na benganna nena om ku” nakua mo Bacok lan penawanna “wihh bisa lalo kuna ku kalaccikki” “apara alamu alli na kaja buda tu doi mu?” “lanallina golla–golla sola garappo” “ohh bekamo mai tu u doi mu ku male allianko ntee bangmoko tajanna ka” masannang bangmi te Bacok sang deen omo doi na ampa malemi katodana Bacok nallianni jo pea. Pole bokomi Bacok laku njo nginanna nena nakunmi joo pea ka ”wei pollohhi too jo doi mu bojo bangmo tiroi na eda ku ampa i” nakua Bacok lako joo pea “gobangmo pale daupa ku mangngalli omo” masannang bangmi ia te Bacok sang nampa omi doi.

Nakita bangmi pale indona jo na pugauk nena masse bangmi dikka penawanna indo na “oo puang papole boko i dikka te anakku jio lalan marege danggi dikka na male baang kalasi i tau danggi na makuttu bang ke disuai.

Tonna karuenmo malemi Bacok pangngallianni doi na jo pea to na kalaccikki nena. Nagasa mi ia mangngalli sang kaja buda doi na jo pea too sanggannami apa na alli. Pole mi lako bolana deen tau suai male bali i mang angka barang nakua jo tau “woi Bacok meko mai jolo bali i na mang angka barang” “wiii om ja padik batangku lapole na lako bolaku” alasanna Bacok sang cia i disua “ohh pole moko pale ke mapadikki batang mu”.

Bonginna mapadik batang tonganni Bacok, kumallak-mallak bangmi lako indo na sang mapadik gajai batang na. Nakua mo Indona “apara nena mu kande?” Pekutanaanna indo na Bacok lako Bacok, “eda kuna ku kakande-kande baang yamanda kuna jo camme utan roro sola talloh ku kande” borroi Bacok sang malaja i ke na ussenni indona ka malei kalaccikki pea biccu sang pastinna mi tapa nakua indona ka imboko nala doi mu pake mangngalli na eda kuna ku bengan ko doi te allo.

Edamo pale na mamma sang bongi Bacok sang mapadik gajai batang na. Yamo nasanga papasaananna to tomatua jolo ka anggi borro-borro bang na kalaccik sa tattaki tu napolei abala’ na susi una to na pau lan agama na larang ki iya to mangsipa’ borro na kalaccik.

Masawanna micik tuka’ allo mira te Bacok. Mane micikki tapa mapadik mi ulunna sang masain gajai mamma, tapa larimi Bacok lako dapoh male tiro kande. Tonna jio mi dapoh la lolong bangmi kasole na kitai jo mati kandean jio meja “wihh inda moraiya te mannasu aja buda sikaja melo topara kedikitai” tangmasain kumua susi joo tapa timba Indona Bacok tapa na gorai mi Bacok ka anggi jolo kandei tuu “woi Bacok anggi jolo kandei tuu sang lana kande to pangjama tetoo” tapa mekutana mi Bacok ka “pangjama apa?” nakua mo indo na “apa to jama kaloh jio boko, yanna madoang ko kandei tu apa maleko jolo bali i mangjama jio boko” tapa longgo Bacok to disuai mang jama “ceii gobangmo ku kumande ke manjama ra jolo jarosso ra kuna manjama” tapa laba mi Bacok tama kamara na mamma pole nakua mo indona “Astagfirullah anna susi gaja kuna te annakkaku”

Micik mi Bacok tonna karuen tangbarah bangmo malemi lako dapoh na eda apa na ampa tade topira Indona. Yate Bacok mangnyaru–nyaru bangmi tiroi indo na tapi eda kale na ampa i. Male mi Bacok lako warung sang den unapa pole na joo doi assele’ kalaccikki pea.

Sampe mi jio warung tapa mangngalli omi tapi ternyata mawak mo jo kandoa na kande pole mi lako bolana mapadik omi dikka batang na gara–gara kandei kandoa mawak. Yate indona bojo bangmi mampikkiri apa rayya gajai i te anakkana na mapadik batang tarruh.

Pirang minggu mangkanna mapadik batang tarruh tee Bacok male bang omi punjaja. Den pissen wattu na lappoi motoro sang jio bangngi tangnga lalan. Dibawa mira dikkana lako puskesmas sang tangna kulle mi tiroge jiong bangmira mamma. Untung na deen indona jio tarruh jagai i walaupun biasa na kagalli sola na garra–garra tapi tatta i ia na pakamoja tee anak na. Eda memang mo ia taloi to kasih sayang na to tomatuanta.

Pirang minngu mangkanna na lappo motoro malagah mi Bacok. Garrih mi tuto o kalaccik sola makuttu baang aja rajik mi tuto o yanna disua tapa na jama mi to disuaanni eda mo na mang alasan baang. Yato doi na ala mangka jio pea biccu na papole bokotanmi sola to na ala jio warung na bajah nasanmi. Tutoo liwa mi pato sola aja rajin mi yanna deen pea nakita tumongnga–mongnga jio olo warung tapa nallian bang golla–golla kedeenni doi na tapi yanna edai doi na nakuanni jo pea ka daupa ku allianko kedeen mi doi ku.

Tutoo ia mo marajinna jio kampong na ia tomo makassing na sipa na male tarruh ombo i to tau jio kampong na yanna sitammu tau pasti na petawai moi ke eda na tandai i, mang sedekah tarruh sola patama tarruh doi laan celengan masigi.

Tutoo edamo na mela micik Bacok eda tomo na salai bangngi sumbajang na allo allo male masigi mangngaji tarruh topara. Tutoo lana pekassingngi i sipa na, dari pada menassanni dau mending na pekassingngi mi mammula tutoo.

Deen nasuai indona male tiroanni kaju tapa male mi ia eda mo na mang alasan baang, yanna deen tau mangpatindak bola pasti deen ni jio mambali i, “Bacok maleko jolo allianna cela sang lamannasuna na eda cela inde i doi na ka” passuaanna indo na Bacok “gomo ndo doi ku bangmo pake sang deen unapa” laba mi Bacok nalli cela. Masannang bangmi penawanna Indo na Bacok sang aja kassing mi anakka na tutoo. “Alhamdulillah aja kassingmi anakkaku tutoo” terharu mi te indo na Bacok kitai anak na.

Metada isinni Bacok lako indo na male tiro jamaan jio kota “oo ndo’ male na merantau tiro jamaan ka petadadoanganna ku sukses dau”  “wii nak danggi mu mampugauk ganjang lako ntuu ka ingaran tarruhhi tomatuammu marajin ko massumbajang ku petadadoangan tarruh ko nak” “iye’ ma malemo ka petadadoangan tarruh na ka” labami Bacok merantau lako kalimantan

Tonna jiomo kalimantan malemi tiro jamaan tapa di tarima mi Bacok manjama jio njoo na noi mendaftar. Mangtaun-taun mi Bacok jio kalimantan sukses mitutoo buda mi doina marege to mi jamaanna. La polei Bacok lako kampong na aja mali mi lako Indona.

Tonna sampe mi jio kampong na selang bangmi kitai bola na anna kaja buda tau jio deen topa bendera putih jio olo bolana. Tapa mendemi bola na ternyata pasalai i dikka indo na tapa na gasa mi kumallak nakua bangmo ka “yamo dikka te indoku jampang na mammu la biccu eda baang na magalli ke mampugauk salah na” masse bangmi dikka to tau kitai Bacok kumallak bangmo tapi nabua i ke susi mi to totoh eda kitana di bisa lari jomai totoh ta.

Tonna mangkami di lamun Indo na Bacok jio bangmi dikka na lamunanna indo na kumallak nacuritaan nasan mi perjuanganna tonna jioi perantauan sukses mi tutoo lapole mi bahagiakanni Indo na tapi na salai mi dikka Indo na.

Pole boko mi Bacok lako Perantauan fokus mi lako jamanna tapi biasa paiya pole lako kampong na male jio lamunanna Indo na.

Duang taun mi Bacok na salai Indona, na tarima mi tutoo ka nasalaimi Indo na. Deen pissen wattu sitammui baine Bacok, aja lolo jo baine na kita Bacok yajoo baine disanga Marin. male mi te Bacok sitandaan Marin, pirang bulan mi si tandaan na bottingngi mi Marin te Bacok. Botting mi Marin sola Bacok na sang taun mangka botting ke batang mi Marin, 8 bulan mi tutoo jo anakka na laan batang na. Sang bulan lewa ke anakmi Marin, ma muane anakka na masannang bangmi Bacok sola Marin akhir na bahagia mi hidup na sola dua menassan tomi te Bacok sang aja ganjang sipa na tonna pea muane unapi.