Penassanan

FAIQAH TALITA NUR ALAM

Jio Pasui deen pea disanga Becce’, yatee Becce’ deen sang pea na disanga Ecce’. Yatee Becce’ sola Ecce’ mammula TK pa na sisang pea mo, tutoo SMA mi.

 Deen pissen wattu na singenge Becce’ sola Ecce’ sang cia i Becce’ ke si sang peai Ecce’ sola Marin. Nakua bangmo Becce’ “capai mu cia lalo pesa’dingngina? Ja ganjang sipa’ na joo Marin lana cilakai roko Ecce’ ” na pawwan bangmi Becce’ ka ganjang sipa’ na joo Marin na cia lalo matappa te Ecce’.

Pirangngallo mangkanna joo cia mi Ecce’ pangkadai i Becce’, sola bangmira Marin maningo cia mi si temman Becce. Deen mangka na pangkadai i Ecce’ tee Becce’ apaa cia lalo te Ecce’ pesa’dingngi i susi bangri to eda tau pangkadai i.

“si sang pea moko jo Ecce’ to?” Pekutanaan na joo tau lako Marin, nakua mo Marin “ iyo si sang pea mo tajan bangmi ka, cinggattuk mora na bisa  di patadai tarruh doi’ ”. nasa’ding bangmi pale Becce’ kadanna jo tau sola Marin, tamba cia bangmi ke si sang peai Ecce’ jo Marin sang deen ra pale na kadoangngi.

“eii Ecce’ pesa’dingngira kana, mucia’ lalo ga’na di kuan? Ganjang dikka na sipa’ na joo Marin deen ra apa ana kadoangngi, kusa’ding sabo’ tonna inda de nasipangkadaan jio boko’ passikkolaan” sigasa’ bangmi tee Becce’ kuanni Ecce’ ka ganjang sipa’ na joo Marin na cia’ lalo matappa tee Ecce’. “capai mu pau gaja’ bangngi Marin? Kuussen una cia’ roko ke si temmanna Marin, yanna susi bangko tee ikora ganjang sipa’ mu” tapa laba’ mi Ecce’ tonna mangkai kumua susi joo.

Tonna laba’ mi Ecce’mesa – mesa mira Becce’ tapa deen tau timba disanga Aco’. Ternyata nenapa na kita bangngi Aco’ joo kejadian tapa nakua mo Aco’ “ eda una mu capa Becce’? kuussen una mapadikki penawammu, go’bangmo pikkiri i jolo oko na ussen una dau ke masain – sain mi” nakua todamo Becce’ “ eda kana Aco’ malajara ke na apa – apa mi da na mane useenni to tonganna” “edara Becce’ matappa bangmoko lako aku, aku pa urusu i tee tannang bangmoko”  “ iyo pale.. tapi jagai rampa i Ecce’ ka Aco’”.

Pirang minggu mi eda lalo mo na pangkadai i Becce’ te Ecce’, masse bangmi penawanna Becce’ kitai te Ecce’ na pateen Marin. Jasain mo te Becce’ madoang sipangkada Ecce’ apaa cia laloi Ecce’ sumu kena pangkadai i Becce’

Tonna na ussenni Aco’ ka masse bangngi penawanna te Becce’ malei kuanni “Becce’ eda una apa mu jama tetoo ke pole massikkola? Yanna eda maleki lumingka – mingka” nakua mo Becce’ “eda una apa ku jama, jio imboriki la lumingka – mingka?” pekutanaanna Becce’ lako Aco’,  nakua pole mo Aco’ “sembarang ku’na, ke iko membo ki na marege le” pekutanaanna Aco’ lako Becce’”  “ ke aku jiomo Resting ke karuen sang pasti buda toda tau jio” “ oke pale Sadia bangmoko ku alako ke mangka ashar”.

Tonna karuen malemi Becce’ sola Aco’ jio Resting apaa edana male lending ka male ri ia lumingka – mingka deen too sola na Aco’ undi. Tonna jaomo Resting deen tau nakita Becce’ siraka – raka bangmo, nakua mo Becce’ laan penawanna ‘inda rayya joo le anna susi lalo Ecce’ kukita joo baine namane yajoo muane silalo jo tau na sipangkadaan Marin jio boko’ passikkolaan’. Tonna malemo lako Becce’, Aco’ sola joo solana Aco’ ternyata Ecce’ tongan joo sola jo muane to na solaan Marin mangka. Tonna nakitai Becce’ tapa magalli – galli i Ecce’ lako Becce’, nakua bangmo “ capai mu perundunni na? capai mu aturo’ gajai kaleku? Bisa unana aturu’ mesai kaleku go’mo mu kaja sottak” tapa labami Ecce’ sola joo muane tonna mangkai kumua susi joo. Yadikka te Becce’ kumallak bangmi jio njoo na noi Ecce’ nena, napakamma bangmi Aco’ apaa cia laloi kamma te Becce’. Nakua bangmo Becce’ “anna susi gaja ia jo Ecce’ na pirang taun mokan si pusola edarakayya na ngaranni tonna biccu’ unapakan, yanna male mokan maningo sola, yanna male mokan massikkola sola yanna malekan jiong sa’dan sola” kumallak bangmi dikka tee Becce’. Yatonna kamma mo Becce’ pole mi lako bolana na antara Aco’, yatonna jio lalan nakuanni Aco’ ka “go’mo mupikkiri gajai kadanna Ecce’ menassan una dau ke na ussenmi tonganna”.

Masawanna jio sekolah di benganni tugas se Becce’, di bage kelompokki na si kelompok Becce’, Ecce’ sola Aco’. Yatee Becce’ masannang bangmi sang si kelompok i sola Ecce’ apaa nakuara Ecce’ “cia’na male kerja kelompok kamu’ bangmo sadua kerjai, jarossona kitai lindomi sadua” mangkanna kua susi joo tapa laba’ mi Ecce’ sang natajanmi jo muane jio pintu. Naussenni Aco’ ka mapadik penawai te Becce’ yamo na kamma – kamma baang Becce’ nakua mo Aco’ “ go’mo pikkiri i sola dua bangmiki tetoo kerjai tu tugas, go’bangmo uki i sanganna Ecce’, yake na kagalli i to guru sang ia memang ia cia kerja kelompok” tapa metawami Becce’ to mangkai kumua susi joo Aco’ nakua mo laan penawanna ‘untung na deen Aco’ yanna edai edamo kuna kuusseni la mangngpana kena pateen bangna Ecce’.

Yatee Ecce’ si ces gajami Marin, aja batta’ mi tutoo to sola bangngi Marin, bolos tarruhmo na jama di patama tarruh to’pa BK kama battatanna mo ia. Deen pissen allo nakuanni Marin ka maleki bolos na sa’ding i Becce’ yamo na tapa male kuanni Ecce’ “ei Ecce’ danggi bolos baang ciana kuna ke ketinggalan ko dau madoangna letting tarruh sola iko danggi na susika matua na naiko” tapa nakua mo Ecce’ “eloh ku kuna la bolos raka la massikkola raka sembarang kuna aku danggi mukaja sottak la aturu’ - aturu’ bangna Becce’” na garra’ – garra’ bangmi ia Becce’ te Ecce’.

Mangkanna na garra’- garra’ Ecce’ edamo na deen pangkadai i sang cia’mi mapadik penawa. Yatee Ecce’ tamba batta’ bangmi edabangmo na male massikkola sadua male bangri lelle. Deen tonna malei lako warung Becce’ deen todai Ecce’ jio, te Becce’ eda lalomo na pangkadai i tapa maleri nalli i tonasuananni indo na. Yatonna  la pole mo Becce’ la pole todami Ecce’ apaa yatonna la messuunmi tapa na tahanni jo punna warung “ woi Ecce’ edapa mu bajahhi tuu pangngalamu” nakua mo Ecce’ wah mangkami ku’na ku bajah” naissenni Becce’ ka edapa na bajahhi Ecce’ tapa nakua mo Becce’ “ aku pa bajaranni tanta inde doi’ ku” apaa ed ana man tarima kasi’ tee Ecce’ tapa laba bangri, nakua mo Becce’ laan penawanna ‘anna susi gaja moyya te Ecce’ padahal tonnanu moi di alan mandai waikula na mam tarima kasi’ mo’

Yatonna allo sinian tangna ngaranni Ecce’ bawa songko’ na la upacara to tau, yatonna lamale mo jio barisan to eda na lengkap tapa na rui i Becce’ mane na benganni songko’ na, tapa malemi tee Becce’ lako barisan to edana lengkap. Yatonna mangka upacara na papole bokotanmi songko’ na apaa nakuara Ecce’ “danggi mu kaja gaya, madoang gaja ia kedikuanni marege sipa’ na padahal mu fitnah- fitnah baang Marin” tapa labami jio meja na Ecce’ tomangkai kumua susi joo.

Tonna pole massikkola jio bangngi pagar Ecce’ tajanni Marin na tapa timba Becce’ nakua mo Becce’ “inda mu tajan Ecce’? solaki pole ka eda tau ku solaan” tapa nakua mo Ecce’ “sottak bangko ntuu solana kuna Marin pole, mangngapa ora ku’na sola iko” tapa ta’de ia petawanna Becce’ to mangkai kumua susi joo Ecce’.

Tonna sampe mi Ecce’ jio bolana nakuanni indona ka “Becce’ jio bangmoko bola ka, lamale na cinggattuk jio bolana Ecce’” nakua mo Becce’ “ iye ndo madoi ki pole ka”. Tonna polemi indona deen tetuk nabawa nakua mo indona “ Becce’ meko mai kumande, deen tetuk kubawa” malemi lako dapoh Becce’ na deen tongan pale tetuk nabawa indona, nakua mo Becce’ “wahh imboki nala tetuk? Susika aja melo ke dikitai”  “nabenganna too indona becce’sang polei lako tobotting na aja buda dena joo tetuk na bawa pole” nakande mi joo tetuk sola indona.

Deen tugas na Becce’ kabua bunga hias lana kabua mi to’ karuen apaa edapa bahanna mane i lamale nalli bahan, tonna jioi lalan deen tau nakita singenge jio tangnga lalan ternyata yajoo singenge Aco’sola Ecce’ deen motoro nakita aja lassi, lana lappomi Ecce’ yamo na tapa larimale ru’junni Ecce’ apaa ia ra na lappo jo motoro. Tapa tipallekko mi kalena Becce’ tonna nalappoi joo motoro sang kaja lassi, merara – rara bangmi kalena Becce’ apaa kamma bangri Ecce’ sola Aco’ sang selangngi, yamora na tapa lari male lako Becce’ tonna tapa timba i indona Becce’ kumallak - mallak bangmo kitai Becce’ merara – rara bangmo. Tapa na gorai mi Aco’ ka bawai madoi Becce’ lako puskesmas. Tonna jio puskesmas selang bangmi to tau sang di operasi i Becce’, kumallak bangmi indona Becce’ jio kadera. Yatee Ecce’ menassanbangmi  yanna na ingaranni jo sipa’ na lako Becce’ mangka. Tibukkami jo pintu ruang operasi, messuunmi jo dokter na mane kumua “tabe’ bangmo ibu edamo na bisa di selamatkan tee anakka ta”.

Kumallak bangmi Ecce’ jio lamunanna Becce’, menassan bangmi kenangaranni jo na pugauk lako Becce’ mangka tapia pa mora ladi pugauk kesusimi tee tambisa miki mangngapa – ngapa kumallak mandamo bisa di pugauk.

Pirang bulan mangka  kamateanna  Becce’ edamo nasusi  to jolo Ecce’, marege pole mi sipa’ na tutoo, edamo na male baang sola Marin sang sadar mi tutoo ka menganjang sipa’ na tonna sola bangngi Marin.

Tutoo aja regemi sipa’ na Ecce’ edamo na bolos baang eda tomo na man ta’go – ta’go baang. Ja rajin male lako lamunanna Becce’ yanna mangka massumbajang pasti na petada doangan Becce’, menassanni tutoo sang deen na aja ganjang sipa’ na lako Becce’ yanna na ingaranni sipa’na tonnanu aja panding penawanna, narasa mi tutoo panding na penawanna Becce’ ken a garra- garra i.

Tonns lulus mi SMA Ecce’ sola solana malei lako lamunanna Becce’ bawanni bunga sola petadadoanganni, yatonna pole nasanmo sola na mesa- mesamira jio lamunan Ecce’, mancuritai Ecce’,nacuritaanni allo-allo na tonna ta’de mo Becce’ “Becce’, yatonna ta’de moko aja karorrong kusading, susi to deen ta’de, kuussenmi to’mi capai mu cia’ ke solana Marin maningo, aja ganjang pale sipa’ na Marin, na pengaruhhi ki pale to disolaan maningo le yatonna sola unapiki maningo aja kassing kurasa, sekalinna solana Marin maningo tapa aja ganjang kurasa, nasua tarruh na bolos, napasitandaan tarruh na muane sola nab awa tarruh na lelle. Untung ku madoi sadar ka ganjang pale ke sola bangna Marin, eda bangmo ku melajah to sola bangna maningo ka. Maningo tarruh mora ku jama, male tarruh mora mammotor – motor. Tutoo la melajah rampa na, dikua ku bisa men guru, kekela deen unapoko pasti sola miki kuliah apora musalai na. tapi tenang moko jio ntuu ka andampanganna ka, edamo ku lasusi joo mangka janji na edamo ku batta’ baang. Pole mo pale jolo ka sang la karuen mi, daupa ku male omo jio ntee ke lamale mo kuliah. Assalamualaiku Becce’.